الخميس, 12 فبراير 2015 00:00

مستغرب مني ومنك

Rate this item
(0 تصويت)

هو ايه اللي انا باعمله ده !!
من لحظات بس قبل ما اكتب انتبهت لحاجات باعملها ولسة واخد بالي منها
أنا نفسي مستغربني
هو أنا صحيح بقرأ ايه اليومين دول؟
3 روايات، واحدة رعب لكاتب مصري، ورواية من الأدب العالمي، و التالتة درافت رواية لسة الكاتبة مانشرتهاش
و كتاب رابع في العقيدة.
4 كتب في نفس الوقت وباتنقل بينهم احيانا في نفس اليوم
وماتقوليليش ركز في واحد
عشان لو كنت اعرف كنت عملت
كمان بقالي فترة باكتب في روايتين - سيبك مش هيستحقوا النشر ولا بفكر فيه اصلا- بس ليه باكتب في قصتين في نفس الوقت
ما اعرفش
لأ وكمان عامل مخطط لاعداد كتاب في تكنولوجيا المعلومات
وكتاب تاني في الشمائل المحمدية.. اللهم صل ع النبي
هو أنا ليه اصحابي فعلا مختلفين جداً؟؟
يعني مش طبيعة واحدة
لأ وكمان اكتشفت اني بدون ما اشعر دايماً عندي رغبة في اني اجمعهم
واني اخلي أشخاص مينفعش يتقابلوا قاعدين مع بعض
افتكرت دلوقت انك قلتيلي زمان اني بازهق بسرعة
وباحب التغيير كتير .. وبسرعة
وغالبا كان الكلام له علاقة بالأكل
لأ و الشغل.. ده حكاية
شغال يومياً في اربع حاجات
3 منهم مالهمش اي صلة ببعض
و فيه كمان شغلانة خامسة مش محسوبة
مابخدش منها فلوس
عشان كده باعملها بمزاجي
لكن اني احصر شغلي في حاجة واحدة
مااقدرش

طب وانتي؟!
انتي ليه قاعدة لوحدك متربعة في قلبي
ما بيشاركيش فيه أي حد!
ليه عينيا مش شايفة غيرك؟
ليه كل حاجة في الدنيا دي ما بتكفينيش
ليه كل لذة لوحدها ما بتشبعنيش
إلا إنتِ
انتي وحدك شاغلة قلبي و ساكنة روحي
ولو سبت كل حاجة في الدنيا وانتي معاي
هو ده عندي بس .. معنى الكفاية

Read 1599 times آخر تحديث الجمعة, 13 فبراير 2015 06:07

شادي أحمد

عرفت الله من باب الحب
وتشرف قلبي بحب أحب خلقه صلى الله عليه و سلم
و طُبع في القلب حب امرأة واحدة، هي حبيبتي وصديقتي وابنتي ورفيقة دربي وزوجتي
أحب الصالحين ولست منهم
وأحب خلق الله واعتبر نفسي أقلهم
أمانة عليك ياللي دخلت الصفحة تدعيلي وزوجتي بظاهر الغيب
يزيدنا ربنا من حبه
ويفرج عنَّا كل كرب
و يبعد عنَّا أذى العين
و ليك -يا رب- بالمثل
و صل يا رب على الحبيب المحبوب

Website: shadyahmed.com