الإثنين, 29 سبتمبر 2014 00:00

اعتذار

Rate this item
(117 تصويت)

باعتذر عن كل لحظة مرت يا حبيبتي كان المفروض اقولك فيها بحب .. انتي احلى حاجة في دنيتي.. انتي كل دنيتي .. باعتذر مش على اني في لحظة واحدة محستش باحساسي ده لا.. على اني بس نسيت.. على اني بس قصر رغم انك في كل لحظة كنتي واقفة جنبي و استحملتيني بس انا ماقولتش و ماوصلش ده..
و الله يا إيمان ولا مرة نسيت اللي بتعمليه او قلت ده واجب وعادي .. لا والله.. لو قصرت عن تعبيري لحبك يمكن كانت قلة خبرة وتجربة و صغر سن يمكن.. مكنش لي اي تعامل ببنت يمكن.. مكنتش قادر اوصل ده و فاكره بيوصل يمكن يمكن.
يمكن حاجات كتير والانسان طبيعته انه كل يوم بيتعرف على نفسه اكتر ، بس الاكيد ان الحقايق لازم في يوم تتقال.
حقيقة لإن الوهم بيتكشف مع الوقت .. الحقيقة بتفضل ثابتة مهما مر عليها الوقت .. مهما حصل معاها من مواقف و ازمات..
الحقيقة و الكلام اللي عايز اقوله اني عمر قلبي ما وقف لحظة عن حبك..
الحقيقة ان 12 سنة فاتوا مفيهمش لحظة واحدة قلت فيها كفاية حب لايمان كده .. ومهما حصل خلالهم ما بيننا من خلافات و مشاكل عمري طبعا ما اتبدلت مشاعري في لحظة فيهم
12 سنة حلوين علي.. هو العمر فيه كام اتناشر سنة!! كافيين بكل ما تعنيه كلمة الكفاية اني اعيش عليهم لما افتكرهم ده لو اصلا فارقوني
12 سنة بالنسبة لي أنا كانوا الجنة في الارض ، و كل يوم كان فيها احلى م اللي قبله ..
انتي كنتي تستحقي اكتر من اي حاجة انا عملتها او اكبر من حتى اي كلمة صادقة قلتها ، و باشكرك شكر ما ينتهيش شكر مالوش حدود ، ومناي اني اشيلك من على الارض واخبيكي في قلبي كل لحظة لغاية ما اموت.. بس قلبي هيفضل عايش طول ما حبك بينبض جواه.

Read 2430 times آخر تحديث السبت, 14 فبراير 2015 02:59

شادي أحمد

عرفت الله من باب الحب
وتشرف قلبي بحب أحب خلقه صلى الله عليه و سلم
و طُبع في القلب حب امرأة واحدة، هي حبيبتي وصديقتي وابنتي ورفيقة دربي وزوجتي
أحب الصالحين ولست منهم
وأحب خلق الله واعتبر نفسي أقلهم
أمانة عليك ياللي دخلت الصفحة تدعيلي وزوجتي بظاهر الغيب
يزيدنا ربنا من حبه
ويفرج عنَّا كل كرب
و يبعد عنَّا أذى العين
و ليك -يا رب- بالمثل
و صل يا رب على الحبيب المحبوب

Website: shadyahmed.com